早排暑假全港掀起一股多啦A夢熱潮，全港多地都可以見到呢隻藍色機械貓嘅身影。雖然多啦A夢嘅香港實體展覽已經完咗，但活動就頻頻喺海內外獎項出現，例如最近喺公布賽果嘅國際性市場策劃獎項Galaxy Awards 2024，昂坪360就憑住「100%多啦A夢&FRIENDS@昂坪360」，攞到12個獎，Kelly覺得認真犀利！

　　12個獎包括3個金獎、4個銀獎、2個銅獎，同埋3個榮譽獎，包括「移動媒體：社交媒體」金獎、「特別活動：品牌知名度」金獎、「宣傳：旅遊業」銀獎，同「公共關係：活動市場推廣」銀獎等。Kelly都喺暑假上過昂坪360，尋找多啦A夢嘅蹤影，不得不佩服昂坪360團隊喺活動策劃上嘅創意！除咗有多啦A夢主題纜車、胖虎唱歌場景裝置俾人瘋狂「打卡」外，仲有巨型扭蛋機，俾大家換多啦A夢法寶文具返屋企。

　　Kelly仲記得，活動頭炮係一張由好多人砌成多啦A夢頭像嘅相，嗰張相有成差唔多1500個嚟自4間學校嘅學生同慈善機構義工，着上特定顏色嘅衫同帽，排排企喺啱嘅位置，先可以砌成多啦A夢個樣，真係非常佩服昂坪360團隊嘅膽識同策劃能力！

　　昂坪360團隊就同小妹講，好多謝Galaxy Awards嘅認可，佢哋會將認可轉化為動力，又透露宜家籌備緊年尾多個新搞作，叫大家密切留意！